ᐆᒃᑐᕋᓱᐊᖅᑐᑦ: ᑕᓯᐅᔭᕐᔪᐊᖅ (ᓴᓂᑭᓗᐊᖅ)

ᐃᓄᑭᓛᖑᔪᖅ  ᐊᕕᑦᑐᖅᓯᒪᔪᖅ ᓄᓇᕗᒻᒥ  ᐃᓚᖃᖅᑐᖅ  ᐊᑕᐅᓯᑐᐊᕐᒥᑦ ᓄᓇᓕᒻᒥ, ᓴᓂᑭᓗᐊᖅ (ᐃᓄᒋᐊᓐᓂᖓ 1,014), ᑭᓯᐊᓂ  ᐅᖓᓯᓐᓂᖓ ᐊᔾᔨᐅᙱᔾᔪᑎᒋᔭᖓ.  ᓴᓂᑭᓗᐊᖅ  ᐅᔭᖅᑲᓃᑦᑐᖅ  ᓴᓂᑭᓗᐊ  ᕿᑭᕐᑕᖓᓂᑦ  ᑕᓯᐅᔭᕐᔪᐊᑉ  ᕿᑎᐊᓂ, ᑯᐊᐸᒃᒧᑦ  ᖃᓂᓐᓂᖅᓴᐅᓪᓗᓂ ᓄᓇᕗᒻᒧᑦ.

ᐊᒥᓲᓗᐊᙱᑦᑐᓂᒃ  ᒐᕙᒪᒃᑯᓐᓂᒃ ᐃ ᖅᑲᓇᐃᔮᑦᓴᖅᑕᓕᒃ ᐊᒻᒪᓗ  ᐱᖅᑯᓯᑐᖃᒥᓂ  ᐊᑐᖅᑐᒻᒪᕆᐅᓪᓗᑎ.  ᓲᕐᓗ, 23  ᐳᓴᓐᑎᐅᔪᑦ  ᐃᓄᖁᑎᖏᑦ ᖃᓪᓗᓈᑎᑑᕈᓐᓇᙱᑦᑐᑦ.  ᐃᓕᓐᓂᐊᕐᕕᖓ ᖃ ᐅᔨᒪᔭᐅᑦᓯᐊᕐᒥᔪᖅ  ᓴᙱᔪᒥᑦ  ᐃᓕᖅᑯᓯᓕᕆᓂᕐᒥᑦ  ᐃᓕᓐᓂᐊᖅᑎᑦᓯᖃᑦᑕᕐᓂᖓᓂ;  ᐃᓕᓐᓂᐊᖅᑏᑦ ᐃᓕᓴᖃᑦᑕᖅᑐᑦ  ᓄᓇᕋᓕᕆᓂᕐᒥᑦ  ᐊᒻᒪᓗ  ᐴᓕᐊᖅᐸᑦᑐᑎᒃ  ᓇᐹᑦᑐᕋᔭᓐᓄᑦ.

ᑖᕙᓂ  ᐊᕕᑦᑐᖅᓯᒪᔪᒥᒃ, ᓂᕈᐊᕋᑦᓴᐅᔪᑦ  ᒥᒃ  ᐊᐸᑲᖅ, ᕌᓄᓪᑦ  ᓛᑦ  ᐊᒻᒪᓗ  ᑖᓂᐅᓪ  ᖃᕕᒃ.

ᓰᐱᓰ  ᖃᐅᔨᒋᐊᖅᓯᒪᔪᑦ  ᑕᒪᒃᑭᓐᓄᑦ ᓂ ᕈᐊᖅᑕᐅᒐᓱᐊᖅᑐᓄᑦ  ᑎᑎᕋᖅᓯᒪᔪᓂᑦ  ᐊᐱᖅᓲᑎᓂ ᒃ ᐃᓄᒃᑎᑐᑦ ᐊᒻᒪᓗ  ᖃᓪᓗᓈᑎᑐᑦ, ᐊᒻᒪᓗ ᖃᐅᔨᒋᐊᕐᕕᒋᓪᓗᒋᑦ  ᓂᕈᐊᖅᑕᐅᒐᓱᐊᖅᑐᑉ  ᓇᒻᒥᓂᕆᔭᖓᓂᑦ ᖃᕋᓴᐅᔭᓕᕆᓂᕐᒧᑦ  ᓂᕈᐊᖅᑕᐅᒐᓱᐊᕐᓂᕐᒧᑦ  ᐅᖃᐅᓯᒃᓴᓂᑦ. ᐊᑐᐃᓐᓇᐅᔪᑦ ᑐᑭᓯᐊᔾᔪᑎᒃᓴᐃᑦ  ᐋᖅᑭᒋᐊᖅᑕᐅᓯᒪᔪᑦ  ᑕᑭᓂᖏᓐᓂᑦ  ᐊᒻᒪᓗ ᑐᑭᓯᐊᔾᔪᑎᒃᓴᖏᓐᓄᑦ.

ᒥᒃ  ᐊᐸᑲᖅ

ᐃᓅᓂᑯᓪᓗᓂ  ᐊᒻᒪᓗ  ᐱᕈᖅᓴᕐᓂᑯ  ᓴᓂᑭᓗᐊᕐᒥᑦ,  ᒥᒃ  ᐊᐸᑲᖅ  ᑯᑦᑎᓂᓕᖕᓂᑦ  12-ᒧᑦ  ᐃᓱᓕᔾᔪᓯᐊᖃᖅᑐᖅ,  ᓄᓇᕗᑦ  ᓯᕗᓂᒃᓴᕗᒻᒥᑦ ᐃᓕᓐᓂᐊᕐᓂᑰᓪᓗᓂ  ᑖᕙᓂ  ᐋᑐᐋᒥᑦ  ᐊᒻᒪᓗ  ᐱᔭᕇᖅᓯᓯᒪᔪᖅ  ᓄᓇᕗᑦ ᓯᓚᑦᑐᖅᓴᕐᕕᖓᓂ  ᐊᕙᑎᓕᕆᓂᕐᒧᑦ  ᐃᓕᓐᓂᐊᕈᑎᐅᔪᒥᒃ  ᐃᖃᓗᓐᓂ.  

"ᒪᓕᒐᓕᐅᖅᑎᙳᕋᓱᓚᐅᙱᑎᓪᓗᖓ,  ᐊᕙᑎᓕᕆᓂᕐᒧᑦ  ᑲᒪᔨᐅᓚᐅᖅᑐᖓ  ᐅᑭᐅᖅᑕᖅᑐᒥᑦ  ᑎᒥᐊᓄᑦ  ᑲᑐᔾᔨᖃᑎᒌᓄᑦ,"  ᐅᖃᖅᑐᖅ ᐊᐸᑲᖅ, ᕼᐋᒻᒪᓚᒃᑯᓐᓄᑦ ᑲᑎᒪᔨᐅᒻᒥᔪᖅ, ᐃᑦᓯᕙᐅᑕᕆᔭᐅᔪᖅ ᐸᕐᓇᐃᓂᕐᒧᑦ  ᐊᒻᒪᓗ  ᓄᓇᓕᕆᓂᕐᒧᑦ  ᑲᑎᒪᔨᕋᓛᖏᓐᓄᑦ. 

ᐊᓯᖏᓐᓄᑦ  ᑲᑎᒪᔨᐅᒻᒥᔪᖅ,  ᓄᖅᑲᖓᑲᐃᓐᓇᖅᑐᖅ  ᒪᓕᒐᓕᐅᖅᑎᙳᓇᓱᓐᓂᖓᓂ.

"ᐃᓄᒃᑎᑑᑦᓯᐊᕈᓐᓇᖅᑐᖓ,  ᐱᕈᖅᓴᖅᑕᐅᓚᐅᕋᒪ  ᐃᓄᒃᑎᑐᐃᓐᓇᖅ,"  ᐅᖃᖅᑐᖅ.

ᐊᐸᑲᖅ ᐅᖃᖅᓯᒪᔪᖅ  ᒪᓕᒐᓕᐅᖅᑎᙳᓇᓱᑦᑐᖅ " ᓂᓪᓕᐊᑦᓯᐊᕋᓱᓐᓂᕐᒧᑦ  ᐃᓄᓐᓄᑦ  ᐊᖏᓂᖅᓴᒥᑦ  ᒐᕙᒪᓕᕆᓂᕐᒧᑦ, ᐱᓕᕆᖃᑎᖃᑦᑎᐊᕈᒪᓪᓗᓂ ᓄᓇᓕᒻᒥᐅᑕᓂᒃ,  ᐊᒻᒪᓗ  ᐋᖅᑭᑦᓱᐃᒍᒪᓪᓗᓂ  ᓯᕗᓂᑦᓴᑦᓯᐊᕆᓐᓂᖅᓴᐅᖁᓪᓗᒋᑦ  ᑭᖑᕚᕆᔭᐅᓛᖅᑐᓄᑦ."

ᐊᖏᓂᖅᐹᖑᔪᖅ  ᐃᓱᒫᓘᑕᐅᔪᖅ  ᐊᕕᑦᑐᖅᓯᒪᓂᕆᔭᖓᓂ:  ᐃᒡᓗᓕᕆᓂᖅ, ᐊᒻᒪᓗ ᐊᖏᓂᖅᐹᖑᔪᖅ  ᐃᓱᒫᓗᓐᓇᖅᑐᖅ ᓂᕈᐊᕐᓇᐅᑎᓪᓗᒍ  ᓄᓇᕗᒻᒥᑦ ᓄᕙᒡᔪᐊᕐᓇᖅ-19−ᖑᔪᖅ, ᐅᖃᖅᑐᖅ.

"ᐊᒥᓱᕈᖅᐸᓪᓕᐊᓂᖏᑦ  ᑲᓇᑕᒥ  ᓯᑕᒪᒋᓕᖅᑕᖓᓂ  ᐋᓐᓂᐊᕈᑕᐅᑖᖅᐸᓪᓕᐊᔪᓂᒃ  ᐅᓗᕆᐊᓇᕐᓂᐅᔪᖅ  ᓯᐊᒻᒪᑉᐸᓪᓕᐊᒍᓇᕐᓂᖓᓂ  ᓄᓇᕗᒻᒥ. ᐃᓄᐃᑦ  ᓂᕈᐊᖅᑏᑦ  ᐊᑦᓱᕈᓐᓇᖅᑐᖅᓯᐅᑐᐃᓐᓇᕆᐊᓖᑦ  ᓂᕈᐊᕆᐊᖅᑐᓇᓱᓪᓗᑎ  ᓄᕙᒡᔪᐊᕐᓇᖅ-19-ᑕᖃᖅᑎᓪᓗᒍ,"  ᐅᖃᖅᑐᖅ.

ᕌᓄᓪᑦ  ᓛᑦ

ᕌᓄᓪᑦ  ᓛᑦ  ᑎᑎᕋᖅᑎᒻᒪᕆᒋᔭᐅᔪᖅ  ᓴᓂᑭᓗᐊᕐᒥᑦ.

ᕌᓄᓪᑦ  ᓛᑦ,  ᐃᓱᓕᑦᑎᓂᑰᔪᖅ ᓚᐃᒃᕼᐊᑦ ᓯ ᓚᑦᑐᖅᓴᕐᕕᔾᔪᐊᖓᓂ,  ᓚᓐᑕᓐ,  ᐋᓐᑎᐊᕆᔫᒥ.

ᓛᑦ  ᐃᒻᒥᓂᒃ  ᓇᓗᓇᐃᕆᔪᖅ  ᐃᖅᑲᓇᐃᔭᖅᑎᐅᔪᖅ  ᒐᕙᒪᒃᑯᓐᓄᑦ  ᖁᑦᑎᓂᖅᓴᒥᑦ  ᐊᐅᓚᑦᑎᔨᐅᓂᑰᔪᖅ,  ᑐᑭᒧᐊᑦᑎᑦᑎᔨᐅᓂᑰᔪᖅ  ᒐᕙᒪᑐᖃᒃᑯᓐᓂᒃ ᐊᒻᒪᓗ  ᐱᔨᑦᑎᕋᕐᓂᑰᔪᖅ  8-ᓂᒃ  ᐊᕐᕌᒍᓂᒃ  ᐊᐅᓚᑦᑎᔨᒻᒪᕆᐅᓂᑰᓪᓗᓂ  ᐅᕝᕙᓘᓐᓃᑦ  ᑎᑎᕋᖅᑎᒻᒪᕆᐅᓂᑰᓪᓗᓂ  ᐊᒥᓱᓂᑦ  ᓄᓇᓕᐅᔪᓂᒃ ᓄᓇᕗᒻᒥ.

ᓂᕈᐊᕋᑦᓴᐅᓂᕋᖅᑐᖅ  ᐱᔾᔪᑎᖃᖅᑐᓂ " ᓂᐱᓕᒫᑦ  ᐃᑲᔫᑎᖃᖅᑐᑦ,  ᐃᖅᑲᓇᐃᔭᖅᑎᐅᓪᓗᓂ  ᒐᕙᒪᒃᑯᓐᓄᑦ  ᑐᑭᒧᐊᑦᑎᑦᑎᔨᐅᓪᓗᓂ, ᑎᑎᕋᖅᑎᒻᒪᕆᐅᓪᓗᓂ,  ᐊᔪᙱᓐᓂᖃᓇᓱᒋᔪᖓ  ᐊᒻᒪᓗ  ᐱᔪᓐᓇᕐᓂᖃᖅᑐᖓ  ᐱᓕᕆᖃᑎᖃᕈᓐᓇᕐᓂᕐᒥᑦ  ᒐᕙᒪᑐᖃᒃᑯᑦ  ᐊᒻᒪᓗ  ᓄᓇᕗᒻᒥ ᒐᕙᒪᖏᓐᓂᒃ  ᐱᔨᑦᓯᕋᖅᑕᐅᓂᖅᓴᐅᓕᖁᓪᓗᑕ  ᓴᓂᑭᓕᐊᕐᒥᑦ."

ᐊᖏᓂᖅᐹᖑᓂᕋᖅᑕᖓ  ᐃᓱᒫᓗᓐᓇᖅᑐᖅ  ᐊᕕᑦᑐᖅᓯᒪᔪᖃᑎᖓᓂ  ᐃᓚᖃᖅᑐᖅ  ᓇᓕᒧᒌᒥᒃ  ᑮᓇᐅᔭᖅᑖᖃᑦᑕᓂᕐᒥᑦ,  ᓂᕆᔭᑦᓴᖃᑦᓯᐊᙱᓐᓂᕐᒥᑦ, ᐃᒡᓗᑭᑦᓴᓂᕐᒥᑦ  ᐊᒻᒪᓗ  ᐃᓱᒪᓕᕆᓂᕐᒥᑦ. 

ᐊᕐᓇᓄᑦ,  ᓱᕈᓯᕐᓄᑦ  ᕿᒫᕕᑕᖃᕆᐊᖃᕐᒥᔪᖅ,  ᐃᒡᓗᕐᔪᐊᒥᑦ  ᐱᙳᐊᕐᕕᖃᑦᓯᐊᕐᓂᖅᓴᐅᒋᐊᓖᑦ  ᐊᒻᒪᓗ  ᐊᐅᖃᑕᕐᑐᓄᑦ  ᐋᓐᓂᐊᕕᓕᐊᕐᑐᓄᑦ  ᐱᔨᑦᑎᕋᐅᑎᑕᖃᑦᓯᐊᓂᖅᓴᐅᒋᐊᓕᒃ.

ᐊᖏᓂᖅᐹᖑᔪᑦ  ᐃᓱᒫᓗᓐᓇᖅᑐᑦ  ᓄᓇᕗᒻᒥᑦ ᑕᒪᑐᒪᓂ  ᓂᕈᐊᕐᓇᐅᔪᒥᒃ ᐃᓱᒪᓕᕆᓂᐅᔪᖅ  ᐊᒻᒪᓗ  ᐅᐃᕆᓯᒪᓃᑦ, ᐋᖅᑭᒋᐊᕈᑕᐅᒍᓐᓇᖅᑐᑦ ᐃᒡᓗᖃᕐᓂᖅᓴᐅᓕᖅᑲᑦ.

ᓛᑦ  ᑕᑯᔪᒪᒻᒥᔪᖅ  ᓱᓕᔪᓂᒃ  ᐊᒻᒪᓗ  ᓴᐃᒻᒪᖃᑎᒌᓂᕐᒧᑦ  ᑲᒥᓴᒃᑯᑦ  ᐊᑐᓕᖁᔭᖏᑦ  ᐊᑐᓕᖅᑎᑕᐅᓗᑎᒃ,  ᐃᓕᓐᓂᐊᕐᓂᕐᒧᓪᓗ  ᖁᑦᓯᓐᓂᐅᔪᑦ ᐋᖅᑭᒋᐊᕈᑕᐅᒋᐊᓖᑦ  ᓯᕗᒧᐊᕈᓐᓇᖅᓯᓂᐊᕋᑦᑕ  ᒐᕙᒪᒃᑯᑦ  ᐊᕕᑦᑐᖅᓯᔾᔪᑎᖏᓐᓂᒃ.

ᑖᓂᐅᓪ  ᖃᕕᒃ

ᑖᓂᐅᓪ  ᖃᕕᒃ  ᐃᓅᓚᐅᖅᑐᖅ  ᑰᔾᔪᐊᕐᒥᑦ,  ᒫᓂᑑᐸᒥ,  ᑭᓯᐊᓂ ᐃᓅᓯᓕᒫᒥᓂᒃ  ᓴᓂᑭᓗᐊᕐᒥᐅᑕᐅᔪᖅ.

ᖃᕕᒃ  ᐃᓱᓕᑦᓯᓚᐅᖅᑐᖅ  ᐃᓕᓐᓂᐊᕐᕕᐊᓕᒻᒥᑦ  2010−ᒥᒃ  ᐊᒻᒪᓗ  ᐃᓱᓕᑦᓯᓚᐅᖅᑐᖅ ᐊᕙᑎᓕᕆᓂᕐᒧᑦ  ᐃᓕᓐᓂᐊᕈᑕᐅᔪᒥᒃ  2013−ᒥᑦ, ᐃᖅᑲᓇᐃᔭᐃᓐᓇᓚᐅᖅᑐᖅ  ᑎᑭᑦᑐᒍ  ᓯᑎᐱᕆ 2021  ᐆᒪᔪᓐᓂᐊᖅᑎᐅᓪᓗᓂ  ᓴᓂᑭᓗᐊᕐᒥᑦ.

ᐱᓇᓱᐊᓂᕋᖅᑐᖅ " ᓂᓪᓕᐊᕕᐅᒍᒪᔪᖅ   ᓴᓂᑭᓗᐊᕐᒥᐅᓄᑦ  ᐃᓱᒫᓗᓐᓇᖅᑐᓄᑦ  ᑲᒪᒋᔭᐅᒋᐊᓕᓐᓄᑦ  ᐊᒻᒪᓗ  ᐱᒻᒪᕆᐅᔪᓂᒃ  ᐅᕙᑦᑎᓐᓄᑦ, ᐱᕙᓪᓕᐊᑎᑦᓯᓂᕐᒥᓪᓗ  ᐃᒡᓗᕐᔪᐊᖁᑎᓂᒃ  ᓄᓇᓕᑦᑕ  ᐱᒋᐊᖃᓪᓚᕆᑦᑕᖏᓐᓂᒃ."

ᐅᖃᖅᑐᖅ  ᓴᓂᑭᓗᐊᖅ  ᐃᓐᓇᒃᑯᕕᑦᑖᕆᐊᓕᒃ  ᐊᒻᒪᓗ  ᐱᙳᐊᖅᑐᓕᕆᓂᕐᒧᑦ  ᐃᓪᓗᕐᔪᐊᖁᑎᓂᒃ.

"ᓄᓇᓕᕗᑦ  ᑲᑎᕝᕕᑖᕆᐊᓕᒃ  ᑲᑎᖃᑎᒌᖃᑦᑕᕐᓂᐊᕋᑦᑕ  ᓄᓇᓕᐅᓪᓗᑕ;  ᒪᒃᑯᓐᓂᖅᓴᐅᔪᑦ  (ᓱᕈᓰᑦ, ᒪᒃᑯᑦᑐᑦ ᐊᒻᒪᓗ ᓄᓇᓕᐅᔪᑦ) ᐱᙳᐊᕐᕕᖃᙱᑦᓯᐊᖅᑐᑦ,"  ᐅᖃᖅᑐᖅ.  "ᒫᓐᓇᐅᔪᖅ   ᕼᐋᑭᕐᕕᕗᑦ  ᐱᑐᖃᓗᐊᕌᓘᔪᖅ,  ᓴᓇᔭᐅᓚᐅᖅᑐᖅ 1993ᒥ, ᑕᖅᑭᓄᑦ ᐱᖓᓱᓄᑦ ᐊᑐᖅᑕᐅᓲᖅ  ᐊᕐᕌᒍᓕᒫᒥᑦ  (ᔮᓐᓄᐊᓕᒥᒃ  − ᒫᑦᓯᒧᑦ.)"

ᓄᓇᕗᒻᒧᑦ  ᑕᒪᑐᒪᓂ  ᓂᕈᐊᕐᓇᐅᓛᖅᑐᒥᑦ,  ᐃᓐᓇᐃᑦ  ᐸᖅᑭᔭᐅᓂᖏᑦ, ᐃᒡᓗᓕᐅᕐᓂᖅ,  ᐃᓕᓐᓂᐊᖅᑐᓕᕆᓂᖅ, ᐋᓐᓂᐊᖃᕐᓇᙱᑦᑐᓕᕆᓂᖅ ᐊᒻᒪᓗ  ᐊᕙᑎᓕᕆᓂᖅ  ᐱᓪᓗᐊᑕᐅᓪᓗᑎᒃ  ᐃᓱᒫᓗᓐᓇᖅᑐᖅ  ᑭᓯᐊᓂ "ᐊᑐᓂ  ᓄᓇᓕᓕᒫᑦ  ᐊᔾᔨᒌᙱᑦᑐᑦ,  ᑕᐃᒪᐃᓐᓂᖓᓄᑦ ᖃᐅᔨᒪᓇᑦᓴᐅᑎᒋᖃᑦᑕᖏᑦᑐᖅ  ᑭᓱᓂᒃ  ᐊᒥᒐᑦᓯᒻᒪᖔᑦ  ᓄᓇᓕᖃᕐᕕᖏᓐᓂᒃ,"  ᖃᕕᒃ  ᐅᖃᖅᑐᖅ.

ᓂᕈᐊᖅᑕᐅᓐᓂᕈᓂ,  ᖃᕕᒃ  ᒥᓂᔅᑕᐅᖃᑕᐅᒍᒪᒐᔭᖅᑐᖅ.