ᐆᑦᑐᕋᓱᐊᖅᑐᑦ: ᐅᖅᓱᖅᑑᖅ

ᐊᑎᖓ  ᔫᐊ  ᕼᐊᐃᕙᓐ (ᐅᖅᓱᖅᑑᖅ)  ᑕᐃᑲᙶᖅᑐᖅ  ᕈᐊᓪᑦ  ᐊᒪᓐᓴᓐ  ᐅᒥᐊᖓᓐᓂ,  ᔫᐊ,  ᐅᑭᐅᓚᐅᖅᓯᒪᔪᖅ  ᐃᒪᖓᓂ  ᐃᑳᓇᓱᑦᑎᓪᓗᒍ ᐅᑭᐅᖅᑕᖅᑑᑉ  ᐊᖅᑯᑎᖓᒍᑦ.

ᐳᓚᕋᖅᑐᓕᕆᓂᖅ  ᐊᖏᓪᓕᒋᐊᖅᓯᒪᔪᖅ  ᐅᖅᓱᖅᑑᕐᒥᑦ  ᑕᐃᒪᙵᓂ  ᖃᐅᔨᔭᐅᔪᒻᒪᑦ  ᕗᕋᐃᓐᒃᓕᓐ  ᐊᒥᐊᒃᑯᓪᓗᑯᖏᑦ  ᖃᓂᒋᔭᖓᓂ 2014-ᒥᑦ  ᐊᒻᒪᓗ 2016-ᒥᑦ.  ᒪᕐᕉᒃ  ᐅᒥᐊᕐᔪᐊᑦ  ᖃᐅᔨᒪᔭᐅᑦᓯᐊᖅᑑᒃ  ᕗᕋᐃᓐᒃᓕᓐ  ᐃᖏᕐᕋᓂᕆᓚᐅᖅᑕᖓᓄᑦ  1845-ᒥᑦ,  ᕿᓂᖅᓱᑎ  ᐅᑭᐅᖅᑕᖅᑑᑉ  ᐊᖅᑯᑎᖓᓂ.

ᓄᓇᕗᑦ  ᒪᓕᒐᓕᐅᕐᕕᒻᒥᑦ,  ᐃᓱᒫᓘᑕᐅᔪᑦ  ᓴᖅᑭᑕᐅᓚᐅᖅᑐᑦ  ᐃᓚᖃᖅᑐᑦ  ᐅᖃᐅᓯᕐᒥᓂᒃ  ᐊᓯᐅᔨᓂᕐᒥᑦ,  ᐆᒪᓇᓱᐊᕐᓂᐅᑉ  ᐊᑭᑐᓂᖓ, ᐊᒥᒐᓗᐊᓪᓚᕆᓐᓂᖏᓐᓂᒃ  ᐃᓱᒪᓕᕆᓂᕐᒧᑦ  ᐊᒻᒪᓗ  ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ  ᐃᑲᔫᑎᑦᓴᓂᑦ,  ᓄᓇᓕᒻᒥ ᐋᓐᓂᖅᓯᕆᖃᑦᑕᓗᐊᕐᓂᖏᓐᓂᒃ  ᐊᒻᒪᓗ  ᐃᒡᓗᑭᑦᓴᓗᐊᕐᓂᖏᓐᓂᒃ.

ᑕᕝᕙᓂ  ᐊᕕᑦᑐᓯᒪᔪᒥᑦ  ᐋᓚᓐ  ᐊᒡᓘᑲᖅ, ᒍᕋᐃᒍᕆ ᐊ. ᓇᕼᐊᒡᓗᓕᒃ,  ᐹ ᓪ ᑐᓂᒃ  ᐳᕿᖅᓇᒃ   ᐊᒻᒪᓗ  ᕗᕌᓂᑲ  ᐅᓪᓗᓚᖅ  ᓂᕈᐊᕋᑦᓴᐅᔪᑦ ᓵᓚᖃᕋᓱᐊᖅᑐᑦ  ᒪᓕᒐᓕᐅᖅᑎ ᑑᓂ  ᐋᑯᐊᒻᒥᑦ.

ᓰᐱᓰ  ᖃᐅᔨᒋᐊᖅᓯᒪᔪᑦ  ᑕᒪᒃᑭᓐᓄᑦ  ᓂᕈᐊᖅᑕᐅᒐᓱᐊᖅᑐᓄᑦ  ᑎᑎᕋᖅᓯᒪᔪᓂᑦ  ᐊᐱᖅᓲᑎᓂᑦ  ᐃᓄᒃᑎᑐᑦ  ᐊᒻᒪᓗ  ᖃᓪᓗᓈᑎᑐᑦ, ᐊᒻᒪᓗ ᖃᐅᔨᒋᐊᕐᕕᒋᓪᓗᒋᑦ  ᓂᕈᐊᖅᑕᐅᒐᓱᐊᖅᑐᑉ  ᓇᒻᒥᓂᕆᔭᖓᓂᑦ  ᖃᕋᓴᐅᔭᓕᕆᓂᕐᒧᑦ  ᓂᕈᐊᖅᑕᐅᒐᓱᐊᕐᓂᕐᒧᑦ   ᐅᖃᐅᓯᒃᓴᓂᑦ.  ᐊᑐᐃᓐᓇᐅᔪᑦ ᑐᑭᓯᐊᔾᔪᑎᒃᓴᐃᑦ  ᐋᖅᑭᒋᐊᖅᑕᐅᓯᒪᔪᑦ  ᑕᑭᓂᖏᓐᓂᑦ  ᐊᒻᒪᓗ  ᑐᑭᓯᐊᔾᔪᑎᒃᓴᖏᓐᓄᑦ.

ᐋᓚᓐ  ᐊᒡᓘᑲᖅ

ᓰᐲᓰ−ᑯᑦ   ᓱᓕ  ᑐᓴᓚᐅᖏᑦᑐ   ᑐᓴᖅᑕᐅᔭᕆᐊᓕᖕᓂᑦ 

ᑑᓂ  ᐋᑯᐊᖅ (ᐃᓕᓯᒪᔪᖅ)

ᑑᓂ  ᐋᑯᐊᖅ  ᐃᓅᓚᐅᖅᑐᖅ  ᓲᒪᓐ  ᑲᖏᖅᑐᖓᓂ,  ᓈᓚᕝᕕᕕᓂᐅᑉ  ᖃᓂᒋᔭᖓᓂ.

ᑕᓪᓕᒪᓂᒃ  ᐅᑭᐅᖃᖅᑎᓪᓗᒍ  ᐃᓕᓐᓂᐊᕆᐊᖅᑎᑕᐅᓂᑰᔪᖅ  ᐃᓅᕕᒻᒧᑦ  ᐊᒻᒪ  ᐱᔭᕇᖅᓯᓚᐅᖅᑐᖅ  ᖁᑦᑎᓂᓕᖕᒥ 10-ᒥᑦ  ᔭᓗᓇᐃᕝᒥᑦ.

ᐊᑯᐊᖅ, ᓂᕈᐊᖅᑕᐅᙵᓚᐅᖅᑐᖅ  ᒪᓕᒐᓕᐅᕐᕕᒻᒧᑦ 2 013-ᒥᑦ,  ᓂᕈᐊᖅᑕᐅᒃᑲᓐᓂᓚᐅᖅᑐᖅ  2017-ᒥᑦ  ᑭᒡᒐᖅᑐᐃᓂᕐᒧᑦ  ᐅᖅᓱᖅᑑᕐᒥᑦ.

ᑕᓪᓕᒪᒋᓕᖅᑕᖓᓂ  ᒪᓕᒐᓕᐅᕐᕕᒻᒥᑦ  ᓯᕗᓪᓕᖅᐹᒥᑦ  ᐃᑦᓯᕚᓐᓂᖃᖅᑎᓪᓗᒋᑦ  2017-ᒥᑦ,  ᐊᑯᐊᖅ  ᐃᓕᔭᐅᓚᐅᖅᑐᖅ ᐃᑦᓯᕙᐅᑕᕆᔭᐅᓂᕐᒧᑦ ᑐᓪᓕᒋᔭᐅᓪᓗᓂ  ᑲᑎᒪᔨᕋᓛᓕᒫᓄᑦ,  ᐃᓂᒋᓚᐅᕐᒥᔭᖓ  ᓯᑕᒪᒋᔭᖓᓂ  ᒪᓕᒐᓕᐅᕐᕕᒻᒥᑦ. 

ᒪᓕᒐᓕᐅᖅᑎᙳᓚᐅᙱᑎᓪᓗᒍ,  ᐊᑯᐊᖅ  ᐃᖅᑲᓇᐃᔮᖃᓚᐅᖅᑐᖅ  ᒪᓕᒐᓕᕆᓂᕐᒧᑦ  ᐱᔨᑦᓯᕋᖅᑏᑦ  ᑲᑎᒪᔨᖏᓐᓄᑦ ᓄᓇᕗᒻᒥ.  ᓯᕗᓂᐊᒍᑦ, ᐊᐅᓚᑦᓯᔨᐅᓂᑰᔪᖅ  ᐅᑭᐅᖅᑕᖅᑐᒥ  ᑯᐊᐸᒃᑯᓐᓄᑦ  ᐊᒻᒪ ᓄᓇᓕᒻᒥ  ᓯᓚᓐᓂᐊᖅᑎᐅᓂᑰᔪᖅ/ᑐᓴᐅᒪᑎᑦᓯᔨ  ᐊᕐᕌᒍᓄᑦ 18-ᓄᑦ. 

ᓄᓇᕗᑦ  ᒪᓕᒐᓕᐅᕐᕕᖓᓂ,  ᐊᑯᐊᖅ  ᐅᖃᐅᓯᖃᓚᐅᖅᑐᖅ  ᓄᓇᓕᖓᑕ  ᑐᖁᖓᔪᒃᑯᕕᖓᓂ  ᓴᓇᔭᐅᓯᒪᑐᐃᓐᓇᖅᑐᒥᒃ.

ᐅᖃᐅᓯᖃᖅᓯᒪᒻᒥᔪᖅ  ᐅᖃᐅᓯᕐᒥᓂᒃ  ᐊᓯᐅᔨᓂᕐᒥᑦ,  ᐆᒪᓇᓱᐊᕐᓂᐅᑉ  ᐊᑭᑐᓂᖓ, ᐊᒥᒐᓗᐊᓪᓚᕆᓐᓂᖏᓐᓂᒃ  ᐃᓱᒪᓕᕆᓂᕐᒧᑦ  ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ  ᐃᑲᔫᑎᑦᓴᓂᑦ, ᓄᓇᓕᒻᒥ  ᐋᓐᓂᖅᓯᕆᖃᑦᑕᓗᐊᕐᓂᖏᓐᓂᒃ  ᐊᒻᒪᓗ  ᐃᒡᓗᑭᑦᓴᓗᐊᕐᓂᖏᓐᓂᒃ.

ᐊᑯᐊᖅ  ᐅᖃᐅᓯᖃᖅᓯᒪᒻᒥᔪᖅ  ᐃᓱᒫᓗᓐᓇᖅᑐᒥᒃ  ᓄᓇᓕᐅᑉ  ᖃᖓᑕᓲᒃᑯᕕᖓ  ᐱᐅᙱᓗᐊᓕᕆᐊᑦᓴᖓᓂ.

ᒍᕋᐃᒍᕆ  ᐊ.  ᓇᕼᐊᒡᓗᓕᒃ

ᒍᕋᐃᒍᕆ  ᐊ. ᓇᕼᐊᒡᓗᓕᒃ  ᐃᓕᓐᓂᐊᕐᕕᐊᓗᒻᒧᑦ  ᐃᓕᓐᓂᐊᕆᐊᕐᓂᑰᔪᖅ  ᔭᓗᓇᐃᕝᒥ  ᐊᒻᒪᓗ  ᓄᓇᓯᐅᑎᕐᔪᐊᓄᑦ  ᐊᖁᑎᐅᓂᑰᔪᖅ. ᐱᓕᕆᖃᑕᐅᓯᒪᒻᒥᔪᖅ  ᓄᓇᓕᐅᑉ  ᓂᖃᐃᓱᕐᕕᖓᓂ,  ᕿᓂᖅᑎᓂᑦ  ᐊᒻᒪᓗ  ᐸᖅᓴᐃᔩᑦ  ᐊᐅᓚᑦᓯᔾᔪᑎᖏᓐᓂᒃ  ᐊᒻᒪᓗ  ᓄᓇᓕᒻ ᒥ ᖃᑦᑎᕆᔨᓄᑦ ᐊᖏᔪᖅᑳᖑᓂᑰᓪᓗᓂ  ᐊᕐᕌᒍᓄᑦ 7-ᓄᑦ.

ᑎᑎᕋᖅᓯᒪᓪᓗᓂ  ᖃᕋᓴᐅᔭᒃᑯᑦ, ᓇᕼᐊᒡᓗᓕᒃ  ᐲᔭᐃᕋᔭᖅᑐᖅ  ᐊᕝᕕᐊᕈᑕᐅᔪᓂᒃ  ᐊᒥᓲᓂᖅᓴᓂᒃ  ᐃᓛᒃᑰᖓᔪᓂᒃ  ᐃᒡᓗᖃᓕᓐᓂᐊᕐᒪᑕ  ᐊᒻᒪᓗ ᐊᖏᓂᖅᓴᓂᒃ  ᐃᓪᓗᓕᐊᕐᓂᐊᕐᒪᑕ   ᐅᖅᓱᖅᑑᒥ. 

ᓇᕼᐊᒡᓗᓕᒃ  ᑕᑯᔪᒪᔪᖅ  ᒪᒃᑯᑦᑐᒃᑯᕕᒻᒥᑦ,  ᐅᓪᓗᒃᑯᑦ  ᐅᐸᑲᑦᑕᕐᕕᒻᒥᑦ  ᐃᓐᓇᕐᓄᑦ  ᐊᒻᒪᓗ  ᐊᖏᕐᕋᖃᙱᑦᑐᒃᑯᕕᒻᒥᑦ  ᐃᓂᒋᔭᐅᔪᒥᑦ ᐊᒥᒐᓗᐊᕆᔭᐅᔪᓂᑦ  ᑎᑭᐅᒪᖁᓪᓗᒋᑦ  ᐃᓄᓐᓄᑦ.

ᐊᑐᐃᓐᓇᖃᓐᓂᖅᓴᐅᓂᕐᒥᑦ  ᐃᓱᒪᓕᕆᓂᕐᒧᑦ  ᐱᔨᑦᓯᕋᐅᑎᓂᒃ  ᐊᒻᒪᓗ  ᐅᐃᕆᓯᒪᔪᓄᑦ  ᒪᒥᓴᐃᓂᕐᒥᑦ  ᓯᕗᓪᓕᐅᔾᔨᒐᔭᖅᑕᖏᑦ  ᓇᕼᐊᒡᓗᓕᐅᑉ.

ᑕᐃᒪᐃᒍᒪᒻᒥᔪᖅ,  ᓄᓇᓕᒻᒥ  ᐋᓐᓂᐊᖃᕐᓇᙱᑦᑐᓕᕆᓂᖅ  ᐱᐅᓂᖅᓴᐅᓕᕐᓗᓂ  ᐊᒻᒪᓗ  ᑖᒃᑯᐊᑦᓴᐃᓐᓇᐅᓂᖅᓴᐅᓕᕐᓗᑎ  ᐋᓐᓂᐊᕕᖓᓂ.

ᐊᒥᓲᓂᖅᓴᓂᒃ  ᐃᖅᑲᓇᐃᔮᑦᓴᖅᑕᖃᕐᓗᓂ  ᐊᒻᒪᓗ  ᐊᑐᐃᓐᓇᖃᕐᕕᐅᓂᖅᓴᐅᓗᑎ  ᐱᓕᒻᒪᑦᓴᐅᑎᓂᒃ  ᓯᕗᓪᓕᐅᑎᒐᔭᕐᒥᔭᖏᑦ,  ᓇᕼᐊᒡᓗᓕᒃ  ᐅᖃᖅᑐᖅ.

ᐹᓪ  ᑐᓂᒃ  ᐳᕿᖅᓇᒃ

ᐹᓪ  ᑐᓂᒃ  ᐳᕿᖅᓇᒃ  ᐃᓅᓂᑰᔪᖅ  ᔭᓗᓇᐃᕝᒥ,  ᑭᓯᐊᓂ  ᐅᖅᓱᖅᑑᒥᐅᑕᐅᓂᑰᔪᖅ  ᐃᓅᓯᓕᒫᐸᓗᖓᓂ.  ᐃᓕᓐᓂᐊᕐᕕᐊᓗᒻᒥᑦ  ᐃᓱᓕᑦᑎᓚᐅᖅᑎᓪᓗᒍ 2000-ᒥᑦ, ᐃᓱᓕᑦᑎᓚᐅᖅᑐᖅ  ᐊᕐᕌᒍᓂᑦ  ᒪᕐᕉᓐᓂᒃ  ᐱᙳᐊᖅᑐᓕᕆᓂᕐᒧᑦ ᓯᕗᓕᖅᑎᐅᓂᕐᒥᑦ  ᐃᓅᕕᒻᒥ.

ᒫᓐᓇᐅᔪᖅ ᐃᖃᐃᓕᓴᕐᓂᒃᑯᑦ ᒪᒥᓴᐃᔨᐅᔪᖅ  ᐸᖅᑭᕕᐅᔪᒥᒃ ᐅᖅᓱᖅᑑᒥ.

ᐳᕿᖅᓇᒃ  ᐃᓚᐅᓯᒪᒻᒥᔪᖅ ᓄᓇᓕᐅᑉ  ᐃᓕᓐᓂᐊᖅᑐᓕᕆᔨᒃᑯᑦ  ᑲᑎᒪᔨᖏᓐᓂᒃ  ᐊᒻᒪᓗ  ᕼᐋᒻᒪᓚᒃᑯᓐᓂ  ᒪᐃᔭᒧᑦ ᑐᒡᓕᒋᔭᐅᓂᑰᔪᖅ  ᐊᒻᒪᓗ ᑲᑎᒪᔨᐅᓂᑰᔪᖅ  ᐊᕐᕌᒍᓄᑦ  ᒪᕐᕉᓐᓄᑦ.

"ᐃᓄᒃᑎᑑᑦᓯᐊᐸᓗᓲᖑᔪᖓ,  ᐃᓄᒃᑎᑐᑦ  ᑐᑭᓯᐅᒪᑦᓯᐊᖅᑐᖓ,  ᐃᓄᒃᑎᑑᓲᖑᓪᓗᖓᓗ," ᐅᖃᖅᑐ,  ᐃᓚᓪᓗᓂᐅᒃ "ᓱᓕᓗᖓ,  ᐃᓕᓐᓂᐊᖅᑐᖓᓱᓕ ᐃᓄᒃᑎᑑᕈᓐᓇᕐᓂᕐᒥᑦ."

ᐱᓕᕆᐊᖃᕈᒪᓪᓗᓂ  ᐃᒡᓗᓕᕆᓂᕐᒥᑦ,  ᒪᒃᑯᑦᑐᑦ  ᐊᒥᒐᕆᔭᖏᓐᓂᒃ, ᐊᕐᓇᐃᑦ  ᕿᒫᕕᖏᓐᓂᒃ  ᐊᒻᓗᒪ ᓂᕆᔭᑦᓴᖃᑦᓯᐊᕐᓂᕐᒥᑦ ᓯᕗᓪᓕᐅᔾᔨᓚᕆᒃᑲᔭᖅᑕᖏᑦ.

"ᓄᓇᕐᔪᐊᓕᒫᒥᑦ  ᐊᑦᓱᕈᓐᓇᖅᑐᒦᑦᑐᒍᑦ  ᓄᕙᒡᔪᐊᕐᓇᖅ-19  ᐊᓯᔾᔩᓯᒪᓪᓚᕆᑦᑐᖅ  ᓄᓇᕐᔪᐊᕆᔭᑦᑎᓐᓂ  ᐅᓪᓗᒥᐅᔪᖅ.  ᒪᓕᒐᓕᐅᖅᑎᐅᓗᖓ ᑕᑯᒍᒪᒐᔭᖅᑐᖓ  ᐃᒡᓗᒥᐅᖃᑎᒌᓕᒫᑦ  ᓴᓗᒻᒪᖅᓴᐅᑎᓂᒃ  ᑐᓐᓂᓴᖅᑕᐅᓗᑎ  ᑕᒪᓐᓇ  ᐋᓐᓂᐊᕈᑕᐅᓲᖅ  ᐱᔾᔭᐃᖅᓯᒪᓂᐊᕋᑦᑎᒍ. ᒪᓕᒐᓕᐅᖅᑎᐅᓗᖓ ᐊᔭᐅᖅᑐᐃᒐᔭᖅᑐᖓ ᓄ ᓇᕗᒻᒥᐅᓂᒃ  ᐋᓐᓂᐊᓕᕇᒃᑯᓯᖅᑕᐅᖁᓗᒋᑦ,"  ᐳᕿᖅᓇᒃ  ᐅᖃᖅᑐᖅ. 

ᕗᕌᓂᑲ  ᐅᓪᓗᓚᖅ

ᕗᕌᓂᑲ ᐅᓪᓗᓚᖅ,  ᐃᓅᓂᑰᔪᖅ  ᐃᖃᓗᒃᑑᑦᑎᐊᕐᒥᑦ  ᐊᒻᒪᓗ  ᐱᕈᖅᓴᖅᑕᐅᓂᑰᔪᖅ  ᐅᖅᓱᖅᑑᕐᒥ,  ᐃᓅᓯᓕᒫᒨᖓᔪᓂᒃ  ᐊᔪᕈᓐᓃᖅᓴᕐᓂᑰᔪᖅ , ᐃᖅᑲᓇᐃᔭᕐᓂᑰᔪᖅ  ᐊᔾᔨᒌᙱᑦᑐᓂᑦ  ᐃᓂᐅᔪᓂᑦ  ᓄᓇᕗ ᑦ ᒐᕙᒪᒃᑯᖏᓐᓄᑦ  ᑕᐃᒪᙵᓂ 2004-ᒥᑦ.

ᒫᓐᓇᐅᔪᖅ  ᐃᖅᑲᓇᐃᔮᖃᖅᑐᖅ  ᓄᓇᕗᑦ  ᒐᕙᒪᒃᑯᑦ ᐃᖅᑲᖅᑐᐃᕕᓕᕆᔨᒃᑯᖏᓐᓄᑦ.

ᐅᓪᓗᓚᖅ  ᐊᑭᓕᖅᓱᖅᑕᐅᒐᓂ  ᐱᓕᕆᓂᑰᔪᖅ, ᐅᖃᖃᑎᖃᕐᓂᕐᒥᑦ  ᐃᓄᓐᓂᑦ  ᐅᖃᖃᑎᖃᕆᐊᓕᓐᓂᒃ  ᑖᒃᑯᓂᖓᓗ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕆᐅᖅᓴᕐᕕᒻᒥ  ᐊᒻᒪᓗ ᐅᖅᓱᖅᑑᕐᒥ  ᒪᒃᑯᑦᑐᑦ  ᑲᑎᒪᔨᕋᓛᖏᓐᓂᒃ.

ᐅᓪᓗᓚᖅ  ᐅᖃᖅᓯᒪᔪᖅ  ᓂᕈᐊᕋᑦᓴᐅᔪᖅ  ᑭᒡᒐᖅᑐᐃᔪᒪᓪᓗᓂ ᓄᓇᓕᒻᒥᐅᖁᑎᖏᓐᓂ ᒃ ᒪᓕᒐᓕᕐᕕᒻᒥᑦ, ᐊ ᓯᖏᓪᓗ  ᑐᕌᕋᑦᓴᐅᔪᓂᒃ, ᓇᓕᒧᑦᑐᓂᒃ ᐱᔪᓐᓇᐅᑎᖃᖁᔨᓪᓗᓂ  ᒐᕙᒪᒃᑯᑦ  ᐱᓕᕆᐊᕈᑎᖏᓐᓂᒃ. 

ᐊᖏᓂᖅᐹᖑᔪᑦ  ᐃᓱᒫᓗᓐᓇᖅᑐᑦ  ᓄᓇᓕᖓᓂ  ᐃᓚᖃᖅᑐᑦ  ᐃᒡᓗᑭᑦᓴᓗᐊᕐᓂᖏᓐᓂᒃ,  ᐊᖏᕐᕋᖃᙱᓐᓂᐅᔪᖅ,  ᐃᓱᒪᓕᕆᓂᖅ ᐊᒥᒐᕆᔭᐅᔪᓪᓗ ᐃᓕᓐᓂᐊᕐᕕᒻᒧᑦ  ᐅᓯᑲᑦᑕᐅᑎᑯᑖᖃᕆᐊᖃᕐᓂᖏᑦ  ᐊᒻᒪᓗ  ᑮᓇᐅᔭᒃᑯᕕᖃᕆᐊᖃᕐᓂᖏᑦ.

ᐅᓪᓗᓚᕐᒧᑦ,  ᐊᖏᓂᖅᐹᖑᔪᑦ  ᐃᓱᒫᓗᓐᓇᖅᑐᑦ  ᓄᓇᕘᓕᒫᒥᑦ  ᐃᓚᖃᖅᑐᖅ  ᒐᕙᒪᒃᑯᓐᓂᒃ  ᑮᓇᐅᔭᖅᑖᖅᑎᑕᐅᓂᕐᒧᑦ  ᐊᒻᓗ ᒪ ᓇᓕᒧᑦᑐᓂᒃ ᐱᔪᓐᓇᐅᑎᖃᖅᑎᑦᓯᓂᕐᒥᑦ  ᐊᕕᑦᑐᖅᓯᒪᓂᐅᔪᓂᒃ.