ᐆᑦᑐᕋᓱᐊᖅᑐᑦ: ᐊᐃᕕᓕᖅ (ᓇᐅᔮᑦ ᐊᒻᒪ ᓴᓪᓕᖅ)

ᓇᐅᔮᑦ (ᐃᓄᒋᐊᕐᓂᖓ 1,012) ᐃᓂᖃᖅᑐᖅ ᐅᑭᐅᖅᑕᖅᑑᑉ ᑭᓪᓕᖓᓂ ᐆᒪᔪᓕᕐᔪᐊᒻᒪᕆᐊᓘᓪᓗᓂ. ᖃᓂᓛᖑᔪᖅ ᓄᓇᓕᐅᓪᓗᓂ ᐅᒃᑯᓯᒃᓴᓕᒃ ᒥᕐᖑᐃᖅᓯᕐᕕᖓᓄᑦ, ᓴᖅᑭᑕᐅᓚᐅᖅᑐᖅ 2003-ᒥᑦ ᐅᐃᔪ ᐸᐃ ᖃᓂᒋᔭᖓᓂ.

ᓇᐅᔮᑦ ᐊᑦᑎᓂᖅᐹᒥᑦ ᐊᑯᓐᓂᖅᓱᖅᑐᓂᒃ ᑮᓇᐅᔾᔭᑦᓴᖅᑐᑦ ᓄᓇᕗᒻᒥᑦ ᐊᕝᕙᓪᓕᐊᖏᑦ ᐃᖅᑲᓇᐃᔭᖅᑎᖁᑎᖏᑦ ᑮᓇᐅᔾᔭᑦᓴᖃᑦᑕᖅᑐᑦ $21,500 ᑐᖔᓂ ᐊᑐᓂ ᐊᕐᕌᒍᒥᑦ ᑕᐃᑲᓂ 2014-ᒥᑦ.

ᓴᓪᓕᖅ (ᐃᓄᒋᐊᕐᓂᖓ 1,376) ᐊᑦᑎᖅᑕᐅᓯᒪᔪᖅ ᑯᐊᕈᓄᑦ ᓇᓂᔭᐅᕙᑦᑐᓂᒃ ᐃᒪᖁᑎᖏᑕ ᖃᓂᒋᔭᖓᓂ.

ᓱᒃᑲᓕᔪᒥᒃ ᐃᓄᒋᐊᑦᓯᕙᓪᓕᐊᓂᖓ ᓄᓇᕗᒻᒥ ᐃᓪᓗᑭᑦᓴᓗᐊᕐᓂᖏᑦ ᐊᑦᓱᕉᑕᐅᒻᒪᕆᑦᑐᖅ ᑕᒫᓂ.

ᐃᓅᒍᓐᓃᖅᑐᖃᓚᐅᕐᓂᖓᓄᑦ ᐊᒻᒪ ᒪᕐᕉᓐᓂᒃ ᓄᕙᒡᔪᐊᕐᓇᖅ-19 ᑕᖃᓚᐅᕐᓂᖓᓄᑦ ᐅᑐᐱᕆ 7-ᒥᑦ ᐊᑦᓱᕈᖅᑎᑦᓯᓯᒪᔪᖅ ᓂᕈᐊᕋᑦᓴᐅᔪᓄᑦ ᑕᐅᕙᓂ ᓄᓇᓕᐅᔪᒥ, ᐆᑦᑐᕋᓱᐊᖅᑐᑦ ᐅᖃᖅᓯᒪᔪᑦ.

ᑕᒫᓂ ᐊᕕᑦᑐᖅᓯᒪᓂᐅᔪᒥᒃ ᕼᐃᓕᓇ ᒪᓕᑭ, ᓵᓚᒪᓐ ᒪᓕᑭ, ᓘᑲᓯ ᐹᓪᓚᔮᑦ ᓇᑯᓛᖅ ᐊᒻᒪ ᔮᓂ ᓂᖏᐅᙵᓐ ᓂᕈᐊᖅᑕᐅᒐᓱᐊᖅᑐᑦ ᓵᓚᒋᔭᐅᒐᓱᐊᖅᑐᑦ ᒪᓕᒐᓕᐅᖅᑎ ᐸᑎᖅ ᓇᑦᓯᕐᒥ.

ᓰᐱᓰ ᖃᐅᔨᒋᐊᖅᓯᒪᔪᑦ ᑕᒪᒃᑭᓐᓄᑦ ᓂᕈᐊᖅᑕᐅᒐᓱᐊᖅᑐᓄᑦ ᑎᑎᕋᖅᓯᒪᔪᓂᑦ ᐊᐱᖅᓲᑎᓂᒃ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ, ᐊᒻᒪᓗ ᖃᐅᔨᒋᐊᕐᕕᒋᓪᓗᒋᑦ ᓂᕈᐊᖅᑕᐅᒐᓱᐊᖅᑐᑉ ᓇᒻᒥᓂᕆᔭᖓᓂᑦ ᖃᕋᓴᐅᔭᓕᕆᓂᕐᒧᑦ ᓂᕈᐊᖅᑕᐅᒐᓱᐊᕐᓂᕐᒧᑦ ᐅᖃᐅᓯᒃᓴᓂᑦ. ᐊᑐᐃᓐᓇᐅᔪᑦ ᑐᑭᓯᐊᔾᔪᑎᒃᓴᐃᑦ ᐋᖅᑭᒋᐊᖅᑕᐅᓯᒪᔪᑦ ᑕᑭᓂᖏᓐᓂᑦ ᐊᒻᒪᓗ ᑐᑭᓯᐊᔾᔪᑎᒃᓴᖏᓐᓄᑦ

ᕼᐃᓕᓇ ᒪᓕᑭ

ᕼᐃᓕᓇ ᒪᓕᑭ ᓇᐅᔮᓂ ᓂᕈᐊᕋᑦᓴᐅᔪᖅ ᒪᓕᒐᓕᐅᖅᑎᒻᒧᑦ ᓂᐱᖁᑎᒋᔭᐅᔪᒪᓪᓗᓂ ᓄᓇᕗᒻᒥᐅᓄᑦ ᒐᕙᒪᖓᓄᑦ.

ᒪᓕᑭ ᒐᕙᒪᒃᑯᓐᓄᑦ ᑭᒡᒐᖅᑐᐃᔨᐅᓂᑰᔪᖅ, ᐃᓄᓕᕆᔨᐅᓂᑰᔪᖅ, ᓄᓇᓕᒻᒥ ᒪᓕᒐᓕᕆᓂᕐᒧᑦ ᐱᓕᕆᔨᐅᓂᑰᔪᖅ, ᖃᐅᒪᓂᖅᓴᒥᑦ ᓯᕗᓂᑦᓴᒧᑦ ᑲᒪᔨᐅᓂᑰᔪᖅ ᐊᒻᒪ ᓄᓇᓕᒻᒥ ᑭᒡᒐᖅᑐᐃᔨᐅᓂᑰᔪᖅ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ.

ᓇᐅᔮᓂ ᒪᐃᔭᒧᑦ ᑐᓪᓕᒋᔭᐅᓂᑰᒋᓪᓗᓂ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ ᐊᒻᒪ ᐊᓯᖏᓐᓂᒃ ᑲᑎᒪᔨᕋᓛᓂᑦ.

ᐊᖏᓂᖅᐹᖑᔪᑦ ᐃᓱᒫᓗᓐᓇᖅᑐᑦ ᐊᕕᑦᑐᖅᓯᒪᓂᕆᔭᖓᓂ ᑖᒃᑯᐊᖑᔪᑦ ᓂᖃᐃᓲᑎᓂᒃ ᐃᑲᔫᓯᐊᕐᓂᖅ, ᐃᖅᑲᖅᑐᐃᕕᓕᕆᓂᖅ, ᐸᓖᓯᒃᑯᑦ, ᐃᓪᓗᓕᕆᓂᖅ, ᐃᓕᓐᓂᐊᖅᑐᓕᕆᓂᖅ ᐊᒻᒪ ᐊᕙᑎᖓ. ᐅᖃᓚᐅᕐᒥᔪᖅ ᐃᓪᓗᕐᔪᐊᖅᑖᕆᐊᖃᕐᒥᔪᑦ ᐃᓐᓇᕐᓄᑦ ᐊᒻᒪ ᐱᒡᒐᖅᑐᓄᑦ.

ᐊᐱᕆᔭᐅᓪᓗᓂ ᑭᓱ ᐊᖏᓂᖅᐹᖑᒻᒪᖔᖅ ᐃᓱᒫᓗᓐᓇᖅᑐᖅ ᓄᓇᕗᒻᒥ ᑕᒪᑐᒪᓂ ᓂᕈᐊᕐᓇᐅᔪᒥᒃ, ᑭᐅᓚᐅᖅᑐᖅ "ᓄᕙᒡᔪᐊᕐᓇᖅ-19."

ᓵᓚᒪᓐ ᒪᓕᑭ

ᓵᓚᒪᓐ ᒪᓕᑭ ᐃᓅᓚᐅᖅᑐᖅ ᓴᓂᕋᔭᒻᒥᑦ ᑭᓯᐊᓂ ᓄᑦᑎᕐᓂᑰᔪᖅ ᓇᐅᔮᓄᑦ, ᒪᐃᔭᐅᓂᑰᓪᓗᓂ, ᕼᐋᒻᒪᓚᒃᑯᓐᓄᑦ ᑲᑎᒪᔨᐅᓂᑰᔪᖅ ᐊᒻᒪ ᒪᓕᒐᕋᓛᓄᑦ ᐱᓕᕆᔨᐅᓂᑰᓪᓗᓂ ᐸᐃᓛ.

ᒪᓕᑭ, ᒍᕋᐃᑦ 12-ᒥᑦ ᐃᓱᓕᑦᑎᓂᑰᔪᖅ, ᐃᓄᒃᑎᑑᑦᓯᐊᓲᖅ ᐊᒻᒪ ᖃᓪᓗᓈᑎᑑᑦᓯᐊᓲᖅ, ᐅᖃᓚᐅᖅᑐᖅ ᓂᕈᐊᖃᑦᓴᐅᔪᖅ ᐃᓐᓇᕐᓄᑦ ᑎᓕᐅᕆᔭᐅᓪᓗᓂ.

ᐊᖏᓂᖅᐹᖑᔪᖅ ᐃᓱᒫᓗᓐᓇᖅᑐᖅ ᐊᕕᑦᑐᖅᓯᒪᔫᑉ ᒪᕐᕉᒃ ᓄᓇᓕᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᐅᔪᖅ. ᑭᓯᐊᓂ ᓄᓇᕗᒻᒥ, ᐃᓪᓗᑭᑦᓴᓗᐊᕐᓂᖏᑦ ᐊᒻᒪ ᐊᑲᐅᙱᓕᐅᕈᑕᐅᔪᑦ ᐊᑐᐃᓐᓇᖃᕐᕕᐅᓂᕐᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐃᓱᒫᓘᑕᐅᓂᖅᐹᖑᔪᑦ.

ᓘᑲᓯ ᐹᓪᓚᔮᑦ ᓇᑯᓛᖅ

ᓰᐲᓰ−ᑯᑦ   ᓱᓕ  ᑐᓴᓚᐅᖏᑦᑐ   ᑐᓴᖅᑕᐅᔭᕆᐊᓕᖕᓂᑦ

ᔮᓂ ᓂᖏᐅᙵᓐ

ᔮᓂ ᓂᖏᐅᙵᓐ ᓂᕈᐊᖅᑕᐅᓚᐅᖅᑐᖅ ᒪᓕᒐᓕᐅᖅᑎᒧᑦ ᐊᕕᑦᑐᖅᓯᒪᓂᐅᓚᐅᖅᓯᒪᔪᒥᒃ ᓇᓗᓕᒻᒥ ᒪᓕᒐᓕᐅᕐᕕᒻᒥᑦ ᓄᓇᕗᒻᒥ 2008-ᒥᑦ ᓄᓇᕗᒻᒥ ᓂᕈᐊᕐᓂᖅᑕᖃᖅᑎᓪᓗᒍ. ᓵᓚᐅᓚᐅᖅᓯᒪᔪᖅ 2013-ᒥᑦ ᓂᕈᐊᕐᓇᐅᓚᐅᖅᓯᒪᔪᒥᑦ ᐊᕕᑦᑐᖅᓯᒪᓕᖅᑎᓪᓗᒍ ᐊᐃᕕᓕᖅ.

ᓂᕈᐊᖅᑕᐅᓚᐅᙱᑎᓪᓗᒍ, ᓂᖏᐅᙵᓐ ᑕᓪᓕᒪᐃᖅᓱᖅᑐᓂ ᒪᐃᔭᒋᔭᐅᓚᐅᖅᑐᖅ ᓴᓪᓕᓂ ᐊᒻᒪ ᐊᑕᐅᓯᐊᖅᑐᓂ ᐊᖏᔪᖅᑳᕆᔭᐅᓚᐅᖅᑐᖅ ᓄᓇᕗᒻᒥ ᕼᐋᒻᒪᓚᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ.

ᓂᖏᐅᙵᓐ ᓂᕈᐊᕋᑦᓴᐅᒃᑲᓐᓂᕈᒪᓕᓚᐅᖅᑐᖅ ᐃᓄᓐᓄᑦ ᑎᓕᐅᕆᔭᐅᓪᓗᓂ ᓴᓪᓕᓂ ᐊᒻᒪ ᓇᐅᔮᓂ. 

ᓂᖏᐅᙵᓐ ᐅᖃᖅᑐᖅ ᐱᓕᕆᓂᑯᒋᔭᖓ ᑲᔪᓯᑎᒃᑲᓐᓂᕈᒪᓕᖅᑕᖓ ᒪᕐᕉᓐᓄᑦ ᓄᓇᓕᐅᔪᓄᑦ.

ᓄᓇᓖᓐᓂᒃ ᑕᒪᒃᑮᓐᓂᒃ, ᓄᓇᕗᒻᒥ ᑕᐃᒪᐃᒻᒪᑦ, ᐊᒥᒐᓗᐊᕐᓂᖏᑦ ᐃᓄᓕᒫᓄᑦ ᐃᓪᓗᓂᑦ ᐊᖏᓂᖅᐹᖑᔪᖅ ᐊᑲᐅᙱᓕᐅᕈᑕᐅᓪᓗᓂ, ᐃᓅᓯᕐᒧᑦ ᐊᑲᐅᙱᓕᐅᕈᑕᐅᕙᓕᖅᓱᓂ, ᐅᖃᖅᑐᖅ.

ᐊᓯᖓ ᐃᓱᒫᓗᓐᓇᓪᓚᕆᑦᑐᖅ ᐃᓱᒪᓕᕆᓂᐅᔪᖅ ᐊᒻᒪ ᐊᑐᐃᓐᓇᖃᕐᕕᐅᓂᖏᑦ ᐱᔨᑦᑎᕋᐅᑎᓂᒃ. ᐃᓄᓕᒫᑦ ᖃᑦᓯᓂ ᐅᑭᐅᖃᕋᓗᐊᖅᐸᑕ ᐃᑲᔪᖅᑕᐅᒋᐊᓖᑦ ᐃᓅᓯᖏᑦ ᖃᓄᐃᙱᑦᓯᐊᖁᓪᓗᒋᑦ, ᐅᖃᖅᑐᖅ.

ᐸᑎᖅ ᓇᑦᓯᖅ (ᐃᓕᓯᒪᔪᖅ)

ᐸᑎᖅ ᓇᑦᓯᖅ ᐃᓅᓚᐅᖅᑐᖅ ᐊᒻᒪ ᐱᕈᖅᓴᖅᑕᐅᓚᐅᖅᑐᖅ ᓴᓪᓕᓂ. 

ᓂᕈᐊᖅᑕᐅᙵᓚᐅᖅᑐᖅ ᓄᓇᕗᑦ ᒐᕙᒪᒃᑯᖏᓐᓄᑦ ᑕᒪᐅᓇᑐᐃᓐᓇᖅ ᓂᕈᐊᕐᓂᖅᑕᖃᖅᑎᓪᓗᒍ 2004-ᒥᑦ, ᓂᕈᐊᖅᑕᐅᒃᑲᓐᓂᓕᖅᑐᓂᓗᓂ ᑕᐃᑲᓂᑦᓴᐃᓐᓇᖅ ᐊᕐᕌᒍᒥᑦ. ᐊᒥᓱᓂᒃ ᒥᓂᔅᑕᐅᓂᕐᒧᑦ ᑲᒪᒋᔭᖃᓚᐅᖅᑐᖅ, ᑕᒪᒃᑯᐊᓗ ᐃᓪᓗᓕᕆᓂᖅ, ᐱᕙᓪᓕᐊᔪᓕᕆᓂᖅ ᐃᖏᕐᕋᔪᓕᕆᓂᕐᓗ, ᐊᕙᑎᓕᕆᓂᖅ ᐊᒻᒪ ᐃᖅᑲᓇᐃᔭᖅᑏᑦ ᓇᓪᓕᐅᒃᑯᒫᖏᓐᓄᑦ ᑲᑎᒪᔨᓂᑦ. 

ᓇᑦᓯᖅ ᕿᒪᕉᑎᓕᓚᐅᖅᓯᒪᔪᖅ ᓄᓇᕗᒻᒥ ᒐᕙᒪᓕᕆᓂᕐᒥᑦ ᐊᒻᒪ ᐃᑲᔪᖅᑎᒋᔭᐅᓕᓚᐅᖅᑐᖅ ᓕᐅᓇ ᐊᒡᓘᑲᕐᒧᑦ ᐊᕐᕌᒍᓄᑦ 6-ᓄᑦ ᓄᓇᕗᒻᒧᑦ ᒪᓕᒐᓕᐅᖅᑎᒻᒪᕆᐅᑎᓪᓗᒍ.

2017-ᒥ, ᒪᓕᒐᓕᐅᖅᑎᙳᓐᓇᓱᓕᓚᐅᖅᑐᖅ ᓂᕈᐊᖅᑕᐅᓪᓗᓂ ᒥᓂᔅᑕᐅᑎᓄᑦ 2018-ᓂᑦ ᒥᓂᔅᑕᕆᔭᐅᓕᖅᑐᓂ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓄᑦ ᐊᒻᒪ ᓄᓇᕗᒻᒥ ᓯᓚᑦᑐᖅᓴᕐᕕᒻᒧᑦ.

2020-ᒥ, ᓇᑦᓯᖅ ᒥᓂᔅᑕᐅᓂᕐᒥᓄᑦ ᐊᓂᑕᐅᓚᐅᖅᓯᒪᔪᖅ ᕙᐃᔅᐳᒃᑯᑦ ᑎᑎᕋᓚᐅᖅᓯᒪᑎᓪᓗᒍ "ᐃᓅᓯᓕᒫᑦ ᐱᒻᒪᕆᐅᔪᑦ," ᐅᖃᐅᓯᑦᓴᖅ ᐃᓄᒋᐊᓄᑦ ᑕᑯᔭᐅᓪᓗᓂ ᐊᑭᕋᖅᑐᖅᓂᖓᓂ ᕿᕐᓂᖅᑕᑦ ᐃᓅᓯᖏᑦ ᐱᒻᒪᕆᐅᔪᑦ ᐱᓕᕆᐊᖑᔪᒧᑦ. ᑎᑎᕋᖅᓯᒪᔪᖅ ᐊᑭᕋᖅᑐᓕᓚᐅᕐᒥᔪᖅ ᑖᒃᑯᐊᒎᖅ ᕿᕐᓂᖅᑕᑦ ᐊᕐᓇᐃᑦ ᓇᔾᔨᐊᖏᖅᑕᐅᖃᑦᑕᕐᓂᖏᓐᓂᒃ.

ᓇᑦᓯᖅ ᐅᖃᖅᓯᒪᔪᖅ ᐊᓕᐊᓇᐃᒍᓱᑦᓯᒪᔪᖅ ᒪᓕᒐᓕᐅᖅᑎᑐᐃᓐᓇᐅᓂᖓᓄᑦ ᐊᒻᒪ ᓂᕈᐊᕋᑦᓴᐅᒃᑲᓐᓂᖅᑐᖅ ᓱᓕ ᐱᔭᑦᓴᖃᕐᔪᐊᕐᓂᖓᓄᑦ.

ᐃᓪᓗᓕᕆᓂᖅ ᐊᖏᓂᖅᐹᖑᓪᓗᓂ ᐃᓱᒫᓗᓐᓇᖅᑐᖅ ᓄᓇᕗᒻᒧᑦ, ᐅᖃᖅᑐᖅ. 

ᐃᒻᒥᓃᕐᓂᖅ, ᓇᑦᓯᖅ ᐊᑦᓱᕈᓐᓇᕈᑕᐅᔪᒻᒪᕆᐅᔪᖅ ᓄᓇᕗᒻᒥ, ᑲᒪᒋᔭᐅᑦᓯᐊᕆᐊᓕᒃ, ᐅᖃᖅᑐᖅ, ᐃᓄᓕᒫᑦ ᓄᓇᕗᒻᒥ ᐃᓱᒪᑦᓴᖅᓯᐅᕆᐊᖃᓕᖅᑐᑦ ᓯᓚᑖᓃᖔᕐᓗᑎᒃ.