ᐆᑦᑐᕋᓱᐊᖅᑐᑦ: ᐃᖃᓗᐃᑦ−ᓯᓈ

ᓄᓇᓕᒃᑯᑦ, ᑕᒪᓐᓇ ᒥᑭᓐᓂᖅᐹᖅ ᐃᖃᓗᐃᑦ ᓂᕈᐊᖅᑐᓕᕆᓂᕐᒧᑦ ᐊᒻᒪᓗ ᐃᓚᖃᖅᑐᑦ ᐃᒻᒪᖄ ᐊᑕᖏᖅᓯᒪᔪᒃᑯᑦ ᕿᑎᐊᓂ ᓄᓇᓕᒥ ᓄᓇᓕᖃᖅᑐᓄᑦ ᐃᓅᖃᑎᒌᒃᑐᑦ. 

ᐃᓚᖏᑦ ᓴᓇᔭᐅᓯᒪᔪᑦ ᐃᖅᑲᓇᐃᔭᖅᑎᓄᑦ ᐊᒻᒪᓗ ᐊᑐᖅᑐᐊᖅᑐᓄᑦ ᐃᒡᓗᖃᖅᑐᓂᑦ, ᐆᑦᑑᑎᒋᓗᒍ ᐊᕐᕕᓂᓖᑦ−ᐊᒻᒪᓗ ᐊᕐᕕᓂᓖᑦ ᐱᖓᓱᓂᑦ ᓇᑎᖃᖅᑐᓂᒃ ᐋᔅᑐ ᑭᙵᖓᓂ ᐊᒻᒪᓗ ᑯᕇᒃᓴᐃᑦ ᓄᓇᓕᖓ, ᑭᓯᐊᓂ ᐊᒥᓲᓂᖅᓴᐃᑦ ᓂᕈᐊᖅᑎᑦ ᑕᒫᓂ ᑭᒃᑯᑐᐃᓐᓇᓄᑦ ᐃᒡᓗᓕᕆᓂᕐᒧᑦ ᐃᒡᓗᖃᖅᑐᑦ.

ᐅᑎᖅᑕᐅᔭᐃᓐᓇᖅᑐᑦ ᐊᑲᐅᙱᓕᐅᕈᑕᐅᔪᑦ ᐅᖃᐅᓯᕆᔭᐅᓯᒪᔪᑦ ᓂᕈᐊᖅᑕᐅᒐᓱᐊᖅᑐᓂᑦ ᓄᓇᓕᒥ ᐃᓚᖃᖅᑐᑦ ᐱᖃᓗᐊᙱᓐᓂᖓ ᐊᑦᑕᕐᓇᖅᑕᐃᓕᒪᓂᕐᒧᑦ ᓯᒡᔭᒥ ᐊᒻᒪᓗ ᐱᕈᖅᐸᓪᓕᐊᑐᐃᓐᓇᖅᑐᑦ ᐱᕋᔭᒃᑐᓂᑦ ᐊᒻᒪᓗ ᓄᓇᓕᒥ ᑎᒡᓕᒪᔪᓂᑦ.

ᑖᔅᓱᒪ ᓂᕈᐊᖅᑕᐅᒐᓱᐊᕐᓂᖅ, ᓂᕈᐊᖅᑕᐅᒐᓱᐊᖅᑐᑦ ᐅᑯᐊ ᔭᓂᑦ ᐱᑦᓯᐅᓛᖅ ᐳᕉᔅᑐ, ᑯᕆᔅᑕ ᑯᓄᒃ ᐊᒻᒪᓗ ᔨᕝ ᐅᖓᓚᖅ ᒧᐊᕆᔅ.

ᓰᐱᓰ ᖃᐅᔨᒋᐊᖅᓯᒪᔪᑦ ᑕᒪᒃᑭᓐᓄᑦ ᓂᕈᐊᖅᑕᐅᒐᓱᐊᖅᑐᓄᑦ ᑎᑎᕋᖅᓯᒪᔪᓂᑦ ᐊᐱᖅᓲᑎᓂᒃ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ, ᐊᒻᒪᓗ ᖃᐅᔨᒋᐊᕐᕕᒋᓪᓗᒋᑦ ᓂᕈᐊᖅᑕᐅᒐᓱᐊᖅᑐᑉ ᓇᒻᒥᓂᕆᔭᖓᓂᑦ ᖃᕋᓴᐅᔭᓕᕆᓂᕐᒧᑦ ᓂᕈᐊᖅᑕᐅᒐᓱᐊᕐᓂᕐᒧᑦ ᐅᖃᐅᓯᒃᓴᓂᑦ. ᐊᑐᐃᓐᓇᐅᔪᑦ ᑐᑭᓯᐊᔾᔪᑎᒃᓴᐃᑦ ᐋᖅᑭᒋᐊᖅᑕᐅᓯᒪᔪᑦ ᑕᑭᓂᖏᓐᓂᑦ ᐊᒻᒪᓗ ᑐᑭᓯᐊᔾᔪᑎᒃᓴᖏᓐᓄᑦ.

ᔭᓂᑦ ᐱᑦᓯᐅᓛᖅ ᐳᕉᔅᑐ

ᐃᓅᔪᖅ ᔭᓗᓇᐃᕝᒥ, ᔭᓂᑦ ᐱᑦᓯᐅᓛᖅ ᐳᕉᔅᑐ ᐱᕈᖅᓴᖅᑕᐅᓯᒪᔪᑦ ᓄᓇᑦᑎᐊᕗᒻᒥ, ᐃᖃᓗᐃᑦ ᐊᒻᒪᓗ ᐊᑐᕙᒥ.

ᐳᕉᔅᑐ ᓂᕈᐊᖅᑕᐅᓯᒪᔪᖅ 2019−ᖑᑎᓪᓗᒍ ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔨᐅᓂᕐᒧᑦ ᐱᔨᑦᑎᕋᖅᑐᓂ ᒥᔫᑉ ᑐᒡᓕᐊ.

ᐊᕙᑎᑦ ᐅᑭᐅᑦ ᑭᖑᓂᐊᓂ ᐳᕉᔅᑐ ᐊᑭᓕᖅᑕᐅᓇᓂ ᐃᖅᑲᓇᐃᔭᖅᓯᒪᔪᖅ ᐃᒃᓯᕙᐅᑕᐅᓪᓗᓂ ᐊᓕᐊᓇᑦ, ᑑᓂᒃ ᑕᐃᒻ ᐊᒻᒪᓗ ᐅᖂᑕᖅ ᑲᑐᔾᔨᖃᑎᒌᒃᑯᓐᓄᑦ, ᐊᒻᒪᓗ, ᒫᓐᓇᓵᖅ, ᑲᑎᒪᔨᐅᓚᐅᖅᑐᖅ ᐃᓄᐃᑦ ᑕᕐᕆᔭᒐᒃᓴᓕᕆᔨᒃᑯᑦ ᑎᒥᖁᑎᖏᓐᓂ.

ᒫᓐᓇᐅᖅ ᓄᖅᑲᖓᑲᐃᓐᓇᖅᑐᖅ ᐃᖅᑲᓇᐃᔮᒥᓂᒃ ᐃᖅᑲᓇᐃᔭᖅᑎᑦ ᑭᒡᒐᖅᑐᐃᔨᖓ ᒐᕙᒪᓕᕆᓂᒃᒧᑦ ᑲᑎᒪᔨᐅᓂᕐᒧᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓄᓇᑦᑎᐊᕗᑦ/ᓄᓇᕗᒻᒧᑦ.

"ᓂᕈᐊᖅᑕᐅᒐᓱᐊᖅᑐᖓ ᒥᓂᔅᑕ ᒪᓕᒐᓕᕆᕝᕕᒻᒧᑦ ᐃᖃᓗᐃᑦ−ᓯᓈᒧᑦ ᐅᑉᐱᕈᓱᒃᑲᒪ ᐱᖃᕆᐊᖃᕐᓂᖅ ᐃᓕᓯᒪᔪᒥᒃ ᐊᐅᓚᑦᑎᔨᒥᒃ ᑕᑯᑎᑦᑎᓯᒪᔪᖅ ᑕᐃᒪᐅᓪᓚᕆᒃᑐᓂᒃ ᑎᑎᕋᖅᓯᒪᔪᓂᑦ ᑭᒡᒐᖅᑐᐃᓂᕐᒧᑦ ᐱᔾᔪᑎᒋᔭᐅᔪᓂᑦ, ᐊᒻᒪᓗ ᐃᖅᑲᓇᐃᔭᖃᑎᖃᖅᑐᓂ ᐃᑲᔪᖅᑎᒌᓐᓂᒃᑯᑦ ᑐᓴᒐᒃᓴᕆᔭᐅᓗᑎᒃ ᐃᓱᒫᓘᑎᒋᔭᐅᔪᓄᑦ ᐊᒻᒪᓗ ᐊᑲᐅᙱᓕᐅᕈᑕᐅᔪᓄᑦ ᐊᑐᖅᑕᐅᔪᑦ ᑕᐃᒃᑯᓄᖓ ᐱᖃᖃᓪᓚᕆᒋᐊᖃᖅᑐᓂᑦ ᓄᓇᓕᖃᑎᒌᒃᑎᓪᓗᒋᑦ."

ᐊᓯᖏᑦ ᓯᕗᓪᓕᐅᑎᑕᐅᔭᕆᐊᖃᖅᑐᓂᑦ, ᐱᔪᒪᔪᖅ ᐊᑐᐃᓐᓇᐅᔪᒃᓴᓂᑦ ᑐᓴᒐᒃᓴᓕᕆᓂᕐᒧᑦ ᑲᔪᓯᔪᓄᑦ ᐊᑐᖅᑕᐅᔪᑦ ᖁᐊᖅᓵᕐᓂᕐᒧᑦ, ᓂᕿᖃᙱᓐᓂᕐᒧᑦ ᐊᒻᒪᓗ ᐊᑲᐅᙱᑦᑐᓂᒃ ᐃᒡᓗᓕᕆᓂᕐᒧᑦ ᐊᒻᒪᓗ ᓇᓗᓇᐃᔭᑦᑎᐊᕐᓗᓂ ᐃᓄᐃᑦ ᐅᖃᐅᓯᖃᕈᓐᓇᕐᓗᑎᒃ ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐋᓐᓂᐊᖅᑐᓕᕆᓂᕐᒧᑦ.

"ᐊᑐᕐᓗᒍ ᐊᐅᓚᑦᑎᔨᐅᓂᕐᒧᑦ ᓴᙱᔪᒥᑦ ᐃᑲᔪᖅᑎᒌᒃᑐᓂᑦ ᐊᓐᓇᐃᑦ ᐃᖃᓗᓐᓂ ᐊᕕᒃᓯᒪᔪᑦ ᓄᓇᓕᖃᖅᑐᓕᒫᒥ, ᐃᖅᑲᐅᒪᑎᑕᐅᕗᒍᑦ ᐋᓐᓂᐊᖅᑕᐃᓕᒪᓂᕐᒧᑦ ᓄᓇᓕᖃᕐᓂᖅ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᖅ ᑲᔪᓯᓯᒪᔪᖅ ᐊᑲᐅᙱᓕᐅᕈᑕᐅᓂᕐᒧᑦ ᐃᓱᒫᓘᑎᒋᔭᒧᑦ ᑖᔅᓱᒪᒥ ᓂᕈᐊᖅᑕᐅᒐᓱᐊᕐᓂᕐᒧᑦ," ᑕᐃᒪᓐᓇ ᐅᖃᖅᑐᖅ.

ᓂᕈᐊᖅᑕᐅᓐᓂᖅᐸᑦ, ᐳᕉᔅᑐ ᐅᖃᐅᓯᖃᖃᑕᐅᔪᒪᔪᖅ ᑐᓴᖅᑕᐅᓗᓂ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒻᒪᓗ ᓯᓚᕐᔪᐊᒥ ᓯᓚᒧᐊᖅᐸᓪᓕᐊᔪᑦ ᓴᓂᕐᓂᑦ ᓄᓇᕗᒻᒥ, ᑕᐃᒪᓐᓇ ᐅᖃᖅᑐᖅ.

ᑯᕆᔅᑕ ᑯᓄᒃ

ᑯᕆᔅᑕ ᑯᓄᒃ ᐃᓅᔪᖅ ᕿᑭᖅᑕᕐᔪᐊᕐᒥ, ᑎᒍᐊᖅ, ᐊᒻᒪᓗ ᓄᓇᓕᒥᐅᑕᓪᓗᓂ ᑕᐃᑲᓂ ᑭᓯᐊᓂ ᐊᕐᕕᓂᓖᑦ ᒪᕐᕉᓐᓂᒃ ᐅᑭᐅᖃᓕᖅᑎᓪᓗᒍ, ᐊᒻᒪᓗ ᑕᐃᒪᙵᑦ ᓴᔅᑳᑦᑐᕙᓐᒥ ᐊᒻᒪᓗ ᐳᕆᑎᔅ ᑲᓚᒻᐱᐊᒥ.

ᑯᓄᒃ ᑎᒍᒥᐊᖅᑐᖅ ᐃᓕᑕᕆᔭᐅᔾᔪᑎᒃᓴᓂᒃ ᐃᓕᓐᓂᐊᕌᓂᓐᓂᕐᒧᑦ ᓱᕈᓯᓄᑦ ᐃᓕᓐᓂᐊᕐᓂᕐᒧᑦ ᑲᒧᓴᓐ ᓯᓚᑦᑐᖅᓴᕐᕕᐊᓂᑦ, ᖁᑦᑎᑦᑐᒃᑯᑦ ᐃᓕᑕᕆᔭᐅᔾᔪᑎᒃᓴᓂᒃ ᐃᓕᓐᓂᐊᕌᓂᓐᓂᕐᒧᑦ ᐃᓱᒪᒧᑦ ᐋᓐᓂᐊᖅᑐᓕᕆᓂᕐᒧᑦ ᓄᓇᕗᑦ ᓯᓚᑦᑐᖅᓴᕐᕕᐊᓂᑦ, ᐃᓕᑕᕆᔭᐅᔾᔪᑎᒃᓴᓂᒃ ᐃᓕᓐᓂᐊᕌᓂᓐᓂᕐᒧᑦ ᐃᑲᔪᖅᓱᐃᔨᐅᓂᕐᒧᑦ ᓄᓇᖃᖅᑳᖅᓯᒪᔪᑦ ᐊᒃᓇᐃᑦ ᕿᒫᕝᕕᖓᓂᑦ ᔪᐊᔾ ᐳᕋᐅᓐ ᓯᓚᑦᑐᖅᓴᕐᕕᐊᓂᑦ, ᐊᒻᒪᓗ ᖁᑦᑎᓐᓂᖅᓴᒃᑯᑦ ᐃᓕᑕᕆᔭᐅᔾᔪᑎᒃᓴᓂᒃ ᐃᓕᓐᓂᐊᕌᓂᓐᓂᕐᒧᑦ ᓱᕈᓯᓄᑦ ᐊᒻᒪᓗ ᒪᒃᑯᒃᑐᓄᑦ ᐸᖅᓴᐃᓂᖅ ᓯᓚᑦᑐᖅᓴᕐᕕᒃ ᕕᒃᑐᐊᕆᔭᒥ.

ᑯᓄᒃ, ᐱᒻᒪᕆᐅᔪᒃᑯᑦ ᐃᓕᓯᒪᔪᖅ ᐊᑭᓕᖅᑕᐅᓇᓂ ᐃᖅᑲᓇᐃᔭᕐᓂᕐᒧᑦ, ᐃᖅᑲᓇᐃᔭᖅᓯᒪᔪᖅ ᒐᕙᒪᑦ ᓄᓇᕗᑦ ᐃᓚᒌᒃᑐᓄᑦ ᐃᓄᓕᕆᔨ ᐊᓪᓚᕝᕕᖓᓂ.

"ᑕᑯᔪᒥᓇᖅᑐᖅ ᐊᑲᐅᓈᖅᑐᒃᑯᑦ ᐃᓕᓐᓂᐊᕐᓂᕐᒧᑦ ᐅᕙᓐᓄᑦ ᓂᕈᐊᖅᑕᐅᒐᓱᐊᕐᓗᓂ ᒥᓂᔅᑕ ᒪᓕᒐᓕᕆᕝᕕᒻᒧᑦ ᐃᖅᑲᓇᐃᔭᕐᕕᒋᓂᐊᕐᓗᒍ ᐊᖅᑯᑎᒋᔭᒃᑯᑦ ᑐᕌᖏᓐᓇᖅᑐᖅ ᐱᐅᓂᖅᓴᒧᑦ ᐃᓄᐃᑦ ᓄᓇᕗᒻᒥ," ᑕᐃᒪᓐᓇ ᐅᖃᖅᑐᖅ.

"ᒫᓐᓇᓵᖅ ᐃᖅᑲᓇᐃᔭᕐᕕᒋᓚᐅᖅᑕᓐᓂ ᓱᕈᓯᓄᑦ ᐊᒻᒪᓗ ᒪᒃᑯᒃᑐᓄᑦ ᐃᑲᔪᖅᓱᐃᔨᐅᓂᕐᒧᑦ ᑲᔪᓯᔪᖓ ᑕᑯᓗᒋᑦ ᐱᔨᑦᑎᕋᕐᓂᕐᒧᑦ ᐱᖃᓗᐊᙱᓐᓂᖓᓄᑦ ᐊᒻᒪᓗ ᐃᑲᔫᓯᐊᑦ ᐊᑐᖅᑕᐅᔭᕆᐊᖃᖅᑐᑦ ᐱᖃᕆᐊᖃᖅᑐᓂᑦ ᐊᔪᖅᓴᓗᐊᖅᑐᓄᑦ, ᐊᒻᒪᓗ ᒐᕙᒪᒃᑯᑦ ᐅᑎᒃᑲᓐᓂᕐᓗᑎᒃ ᐅᑉᐱᕆᔭᐅᓂᐊᖅᑐᒃᑯᑦ ᐊᒻᒪᓗ ᑕᐃᒪᐅᖏᓐᓇᕐᓗᑎᒃ ᑭᒃᑯᓕᒫᓄᑦ. ᓴᒡᓗᙱᓐᓂᖅ ᐱᔨᑦᓯᕐᓂᖅ − ᐱᔨᑦᑎᕋᕐᓂᖅ."

ᐊᒃᓱᕈᕐᓇᖅᑐᖅ ᑕᑯᔭᖏᑦ ᐃᓚᖃᖅᑐᑦ ᐱᖃᓗᐊᙱᓐᓂᖏᑦ ᐃᒡᓗᓕᕆᓂᕐᒧᑦ, ᐊᔪᖅᓴᖅᑐᓄᑦ, ᑭᒃᑯᑐᐃᓐᓇᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ, ᓂᕿᓄᑦ ᐊᑦᑕᕐᓇᕈᓐᓇᖅᑐᑦ ᐊᒻᒪᓗ ᐃᓱᒪᒧᑦ ᐋᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐋᖓᔮᕐᓇᖅᑐᓂᒃ ᓄᖅᑲᒍᓐᓇᐃᓕᔪᓄᑦ ᐊᑲᐅᙱᓕᐅᕈᑕᐅᔪᓂᑦ.

ᐱᔾᔪᑎᒋᔭᖓᒍᑦ, ᐱᒻᒪᕆᐅᓂᖅᐹᖅ ᐊᑲᐅᙱᓕᐅᕈᑕᐅᔪᖅ ᓄᓇᕗᒻᒥ ᑖᔅᓱᒪ ᓂᕈᐊᖅᑕᐅᒐᓱᐊᕐᓂᕐᒧᑦ ᐃᓚᖃᖅᑐᖅ ᓴᓇᕝᕖᑦ ᐊᒻᒪᓗ ᐃᒡᓗᓕᕆᓂᕐᒧᑦ, ᐃᓕᓐᓂᐊᕐᓂᕐᒧᑦ ᐊᒻᒪᓗ ᐃᓱᒪᒧᑦ ᐋᓐᓂᐊᖅᑐᓕᕆᓂᕐᒧᑦ.

ᔨᕝ ᐅᖓᓚᖅ ᒧᐊᕆᔅ

ᐃᒡᓗᓕᒃ ᔨᕝ ᒧᐊᕆᔅ ᐊᖏᕐᕋᖓ ᓱᕈᓯᐅᑎᓪᓗᒍ, ᑭᓯᐊᓂ ᐃᓚᒌᑦ ᐃᖃᓗᓐᓄᑦ ᓅᓚᐅᖅᑐᑦ ᓱᓕ ᐃᓕᓐᓂᐊᖅᑎᓪᓗᒍ.

ᐊᖏᓂᖅᓴᓄᑦ ᐃᓕᓐᓂᐊᕌᓂᒃᑎᓪᓗᒍ ᓯᐅᑰᒃ ᓯᓚᑦᑐᖅᓴᕐᕕᐊᓄᐊᓚᐅᖅᑐᖅ ᐳᕐᑭᓕ ᐃᓕᓐᓂᐊᕐᕕᒃ ᑐᓴᕐᓈᕈᑎᒃᓴᓄᑦ, ᐊᒻᒪᓗ ᐱᐊᓂᒃᑐᓂ ᐊᕙᑎᓕᕆᓂᕐᒧᑦ ᖃᕋᓴᐅᔭᓕᕆᓂᕐᒧᑦ ᐱᓕᕆᐊᒃᓴᐃᑦ ᓄᓇᕗᑦ ᓯᓚᑦᑐᖅᓴᕐᕕᐊᓂ ᐊᒻᒪᓗ ᑭᖑᓪᓕᖅ, ᑐᕆᓐᑦ ᓯᓚᑦᑐᖅᓴᕐᕕᐊᓄᑦ ᐃᓕᓐᓂᐊᕆᐊᖅᑐᓂ.

ᒧᐊᕆᔅ ᓄᖅᑲᖓᑲᐃᓐᓇᖅᑐᖅ ᐃᖅᑲᓇᐃᔮᕐᕕᖓᓂᑦ ᓄᓇᕗᑦ ᑐᙵᕕᒃ ᑎᒥᖁᑎᖏᓐᓂᑦ, ᐃᖅᑲᓇᐃᔭᖏᓐᓇᖅᑐᖅ ᐊᑐᐊᒐᓕᕆᓂᕐᒧᑦ ᐊᐅᓚᑦᑎᔨ ᐊᒻᒪᓗ ᐸᕐᓇᐅᑎᓕᕆᓂᕐᒧᑦ.

ᑲᑎᒪᔨᐅᖃᑕᐅᓯᒪᔪᖅ ᓄᓇᕗᑦ ᐃᖃᓗᓕᕆᔨᑦ ᐊᒻᒪᓗ ᑕᕆᐅᒥ ᐱᓕᒻᒪᒃᓴᖅᑎᑕᐅᓂᕐᒧᑦ ᓯᓚᑦᑐᖅᓴᕐᕕᒃ, ᑲᑎᒪᔨᐅᓯᒪᔪᖅ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᖃᓗᓕᕆᔨᑦ ᐋᖅᑭᒃᓱᐃᓂᕐᒧᑦ ᑲᑎᒪᔨᖏᓐᓂᑦ, ᐊᒻᒪᓗ ᑲᑎᒪᔨ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐃᖃᓗᓕᕆᔨᒻᒪᕆᒃᑯᑦ.

ᒧᐊᕆᔅ ᐅᖃᖅᑐᖅ ᓂᕈᐊᖅᑕᐅᒐᓱᐊᕐᓂᖓ ᐱᔾᔪᑎᒋᓪᓗᒋᑦ ᐃᓕᓯᒪᓂᖏᑦ ᐊᒥᓱᓂᑦ ᐅᑭᐅᓂᑦ ᐊᑐᐊᒐᓕᕆᓂᕐᒧᑦ ᐊᒻᒪᓗ ᒐᕙᒪᓕᕆᓂᕐᒧᑦ ᐱᔨᑦᑎᕋᕐᓂᐊᕐᓗᓂ ᓄᓇᕗᒻᒥᐅᑕᓂᑦ.

"ᑕᑯᔪᒪᔪᖓ ᒐᕙᒪᑦ ᓄᓇᕗᑦ ᐱᐅᓂᖅᓴᒥᑦ ᑭᒡᒐᖅᑐᐃᓕᓗᑎᒃ ᒪᒃᑯᒃᑐᒋᔭᖏᓐᓂᑦ ᐊᒥᓲᑎᒋᔭᒃᑯᑦ ᐃᓅᔪᓄᑦ ᐊᒻᒪᓗ ᐃᑲᔪᕈᒪᔪᖓ ᓄᓇᕗᒻᒧᑦ ᐱᐊᓂᑦᑎᐊᕐᓗᑎᒃ ᐱᓪᓚᕆᐅᔪᓂᒃ ᐊᓯᙳᖅᑎᑕᐅᔪᓂᒃ," ᑕᐃᒪᓐᓇ ᐅᖃᖅᑐᖅ. "ᑐᓴᖅᓯᒪᔪᖓ ᐊᒥᓱᓂᑦ ᐅᖃᐅᓯᕆᔭᐅᒃᑲᓐᓂᖅᑐᑦ ᐊᑲᐅᙱᓕᐅᕈᑕᐅᔪᓂᑦ ᖃᐅᔨᒋᐊᙱᓐᓇᖃᑦᑕᖅᑎᓪᓗᖓ ᐃᒡᓗᓕᒫᓄᑦ ᓂᕈᐊᖅᑕᐅᒐᓱᐊᖅᑎᓪᓗᖓ: ᐊᑭᑭᑦᑐᒃᑯᑦ ᓯᓱᕈᓕᕆᓂᕐᒧᑦ ᐸᖅᓴᐃᓂᖅ ᐊᒻᒪᓗ ᐃᑲᔫᓯᐊᓂᑦ ᓄᑕᖅᑲᓕᕆᕝᕕᓐᓄᑦ ᐊᒻᒪᓗ ᓄᑕᖅᑲᓕᕆᕝᕕᒻᒥ ᐃᖅᑲᓇᐃᔭᖅᑎᓄᑦ, ᐊᓯᙳᖅᑎᑦᑎᓂᖅ ᓄᓇᕗᑦ ᑮᓇᐅᔭᓕᐅᕐᓂᕆᔭᐅᔪᓂᑦ ᐃᑲᔫᓯᐊᓂᑦ ᐃᓚᒌᑦ ᐊᔪᖅᓴᖅᑕᐃᓕᒪᖁᓪᓗᒋᑦ ᐊᔪᖅᓴᕐᓂᖅ ᐊᑐᖅᑕᐅᑎᓪᓗᒍ ᐊᒻᒪᓗ ᐃᒻᒥᒃᑰᖓᔪᒃᑯᑦ."